انا متجوزة وعايشة برا مصر
انا متجوزه عايشة برا مصر مكان شغل جوزي و
جوز اختي بيشتغل ف نفس الدولة معانا برضو وهي بلد عربي بس عايشين بعيد عن بعض
كنت بزوره من يومين انا و جوزي عشان عايش لوحده و مقضيها شغل
قعدنا معاه شوية بعدين هو نزل الشغل و احنا كنا لسة قاعدين فاستأذنته اشرب ماية و قولتله احنا اللي هنقفل الشقة و عطانا المفتاح و انا روحت اشرب من التلاجه قبل ما نمشي لقيت كوم مواعين
زعلت طبعا وصعب عليا لانه مسحول ف الشغل فقلت لجوزي هغسل المواعين بسرعة قبل ما نمشي
و انا بغسل المواعين لقيت كوبايتين عليهم روج احمر
مع العلم هو عايش لوحده و اختي ف مصر و بينزل اجازات
انا اتصدمت بس مقولتش لجوزي حاجة
و بعدين جوزي كان بيحطله ف التلاجة شوية اكل كنا جايبينه معانا فيه جبن و حاجات من برا فقولت لجوزي نغسل ايدينا و يلا عشان نمشي
فدخلنا الحمام و انا تايهه اصلا بسبب اللي شوفته
لقينا حنفية البانيو شغالة ع خفيف رحت اقفلها لمحت حاجات خاصه بالستات في ركن الشامبو و حاجات الاستحمام
للاسف شكي اتأكد نزلت انا و جوزي و انا برضو تايهه
جوزي راح يجيب العربية وانا سبته وروحت من ورا اجيب الحاجات اللي في الشقه
لقيت الأمن واقف بيسألني احنا مين قولتله احنا قرايب الاستاذ كذا انا ابقى اخت مراته
قالي يعني اخت مدام كذا اتصدمت من الاسم مش اسم اختي خالص قلتله ايوة عشان مفضحش جوز اختي
و قلتله انت تعرفها منين قالي عرفها اكيد وهي حتى بالاماره مسافره وهتيجي يكره صح قولتله صح
طبعا انا اتأكدت من ظني للاسف وبعدين سابني و مشي
انا للاسف الدمعة نزلت من عيني و حوزي جه و مشينا
جوز اختي يبقى ابن عمي على فكرة و للاسف طول الوقت بشكر فيه قدام جوزي و قد ايه بيحب اختي و صاينها ومتغرب عشانها اتكسفت اقول لجوزي لانه محضرش كلامي مع بتاع الامن وماخدش باله من حاجه
انا مش عارفة اعمل ايه دلوقتي
انا قرفانة من نفسي و زعلانة اوي على اختي الغلبانة البترضى بيه و هو مش بيجي غير شهرين ف السنة و عرضت عليه كتير تيجي معاه موافقش
انا خايفة اوي اقول لاختي دي ممكن حرفيا تروح فيها
بس انا برضو مش هسيبوا ابدا يستغفلها اعمل ايه ؟
وبفكر بكرة اروح تاني عشان اجيب ادلة انا و جوزي تثبت كلامي و هواجه اختي واقولها
و هخلي اخواتي الرجالة يسـ،ـحلوه باذن الله
محتاجه اعرف رايكم وانا صح في اللي هعمله ولا ايه؟
