انا جوزي بيتفرج على أفلام
• دا لازم تخلعيه
” الردود كلها كانت عبارة عن اني ارفع قضية خلع وفي منهم اللي فعلا رشحلي محامي ، وكلهم اجتمعو على حسام الهواري ، عرفت عنوانه وقررت اروحله تاني يوم ، نمت و صحيت الصبح جهزت نفسي وخرجت ، ملقتوش موجود لكن باين انه رجع امبارح لإني لقيت بواقي اكل على الترابيزة ، نزلت و روحت العنوان ، المكان كان زحمة جدا ، ولما سألت عرفت اني كان لازم احجز الاول ومن غير الحجز هضطر استنا للاخر ، قعدت ساعة واتنين وتلاتة و اربعة ، زهقت خلاص ، قومت من مكاني عشان ادخل المكتب ، لقيت السكرتيرة بتمنعني
لو سمحتي ، حضرتك لسة دورك مجاش
= بقولك ايه ، انا استنيت كتير ومش هستنا دقيقة واحدة تاني ، انا هدخل دلوقتي
يا مدام مينفعش كدا ، دا سيستم مينفعش نخالفه
= وانا هدخل يعني هدخل
” فتحت باب المكتب و دخلت
ايه دا في ايه
= انا اسفة والله يا استاذ حسام ، حاولت امنعها بس زي ما حضرتك شايف
” بص ناحيتي وقالي
نعم ، حضرتك عايزة ايه
= انا جيالك في موضوع مهم
وهو مش لازم تستني دورك
= مانا استنيت ، استنيت كتير وانا مينفعش اتأخر اكتر من كدا
برضو مكنش ينفع تدخلي بالشكل دا
= طب انا اسفة
كويس ، اتفضلي بقا و استني دورك زي باقي الناس
” بصتله بغيظ وخرجت ، فضلت قاعدة ساعتين كمان مستنية لحد ما اخيرا دخلت ، كان قاعد على المكتب ، مش مركز معايا ، ولكنه قام من مكانه وانا تلقائيا ابتسمت لإني كنت فاكرة انه هيرحب بيا لكن الحقيقة هو اتلفت وراه عشان يحط اكل في حوض السمك ، خدت نفس عميق وقعدت ، اتكلم وهو مش باصصلي
خير يا مدام نادية ، ايه بقا الموضوع المهم
= وهو انت هتفضل تكلمني بضهرك كدا
لا طبعا ، بس انا حاليا بسمعك وبسمعك ب ودني ف اظن ان وشي مش هيفرق معاكي
= على فكرة دا من الذوق والأدب
ومن الذوق والأدب برضو انك متدخليش مكان بالطريقة اللي أنتي دخلتي بيها دي
= بس انا اعتذرت
اعتذارك مش بيمحي الفعل يا مدام نادية
= يعني انت مقبلتوش
لا قبلته و الدليل اني خليتك تستني لحد ما اخلص
= بجد والله ، امال لو مقبلتوش بقا
كنت لغيت المعاد خالص
= طيب انا اسفة مرة تانية ، كدا كويس
هنفترض ، قوليلي بقا ايه هو الموضوع
= ماهو انا مش هعرف اتكلم وانت مديني ضهرك
” لف وشه ناحيتي
سبق وقولتلك دا ملوش علاقة ، المهم اني سامعك ، ولكن عشان ترتاحي ، اهو ااديني باصصلك
” قاعد قدامي و باصص ليا بتركيز
اتفضلي
= استاذ حسام ، انا عايزة ارفع قضية خلع على جوزي!!
يتبع….
